Description

تاريخ إجراء المقابلة: 11/11/2018
م
طرف المقابلة:
أ. ع. أ.
ذكر
1989
شمال دارفور الفاشر
طالب
رابعه خريج
أعزب
اللقب ش
تعرضت لعدد ثلاثة اعتقالات في 2017-2018 ، الاعتقال الأول من داخل النيلين ، الثاني إعتقال كان أثناء النطق بالحكم في قضية عاصم عمر قبضوني لمدة 3 يوم، الاعتقال الأخير كان من ميدان ابو جنزير، كنّا شغالين مخاطبة عن قضايا إقليم دارفور فأنا عندي موتر بتحرك بيه، لما طلعت من المخاطبة لقيت انه الموتر شالته الشرطة، اثناء نحن ما في القسم جاء رجال الأمن وقالوا عايزننا، سبوا لي دين وسبوا لأسرتي وقبيلتي. اعقب ذلك إساءة لغرب السودان، كما تعرضت للضرب بالبولسين (خرطوم بلاستيك بداخله حديد).
كان معاي 17 طالب بعرف منهم جمال ومصطفى، ممكن اوصلكم بجمال هو بيعرف ال17 طالب وكان معانا محامي تعرض لتقطيع أزرار قميصه، رفعونا في بوكسيين ورفعوا الموتر أيضاً في البوكس، أنا ومعاي 9 في بوكس، في ود عمي شاهد وانا كلمته أنه انا ماشي اجيب الموتر حقي لو ما طلعت معناها اعتقلوني، ممكن تتصلوا عليه على الرقم:.............. .
من أبو جنزير ودونا العمارات شارع 57 مقابل شارع المطار (طلمبة العمارات 57) ، عمارة 4 طوابق كنت بسمع صوت الطيارات وبسمع زحمة الطلمبة، قضيت 4 أيّام بالمعتقل.
أول ما وصلنا نزلونا وقفونا في الشمس والمكان هناك كان فيه 3 زنازين، ما حصل اعتقلوني في المكان ده من قبل. قبضوني في أمدرمان من (أبو روف) بالقرب من النيل تعرضت لضرب شديد وما خلوني أشوف المحل ولما جوا يفكونا ما خلونا نعرف نحن وين.
•في محكمة عاصم
إتقبضت من قدام المحكمة وضربوني بالبوليس، ما قدموا لي مزكرة، ولا وروني أنا معتقل ليه، تم تهديدي بانه لو مشيت مظاهره ح يقتلوني ، الزول القال لي كده كان ضابط بيقولوا ليه يا جنابو ، أنا طلبت محامي ما سمحوا لي، وكانوا بيسيئوا لي وكانوا بيقولوا لي، ما تتكلم، انت قايل روحك جاي ترفه، ما سمحوا لي بأني ألاقي أسرتي او اتصل بيهم، في الاعتقال الأخير الزنزانة كانت باردة وفيها رطوبة عالية فقاموا جابوا لي حبوب لأني طلبتها، ما كانت بوصفة طبيب.
ظروف الاعتقال:
وصف الزنزانة وتفاصيل التعذيب وسوء المعاملة:
الاعتقال كان في شمبات (المرسى)كنت بشرب شاي في فترة حكم عاصم عمر جات قوة من الرجال لابسين ملكي هاجموا محل الشاي وتم ضربي وأثناء ده تدخلت ست شاي اسمها (حرة) وكانت بتبكي لأنهم بيضربوني ورفعوني وكان في مواطنين تانين بس ما بتذكر هم كم أو منو ودّوني مكان ، كلبشوا لي يديني كانوا بيمسكوا رأسي ويضربوا بيه الحائط، أصبت بنزيف في أذني الشمال، أصبت بالإغماء وصحيت الْيَوْمَ التاني، بعد زمن لقيت أحد العساكر من ناس المباحث وحكي لي الحصل. غمرت ودوني قسم الصافية والشرطة رفضت تستلمني لأن وضعي الصحي كان خطير ، ودّوني قسم بحري وقسم بحري رفض يستقبلني إلا بعد اخراج اورنيك 8 لان حالتي كانت صعبة. الشرطة طلعت الاورنيك يفيد بإنه أنا جيت سكران وضربت رأسي بالحيطة ودوني المستشفى وعملوا لي ضمادات وقال لي كانوا برشوك بمويه باردة علشان تصحي عملوا لي ضمادات للإذن ورجعوني السجن انا لما صحيت لقيت هدومي مليانة دم لدرجة انها ملصقه فيني نتيجة للحاجة دي انا كان عندي صداع شديد يستمر لمدة ممكن تكون 3 أيّام ونتيجة لذلك بقيت بنسى كتير، نتيجة لهذا بقيت أتعامل بتسجيل أي معلومة في مذكرة وأي حاجة ما بسجلها بنساها طوالي، فتحوا ضدي بلاغ سكر حكم علي بغرامة قدرها 3 ألف و45 جلدة.
في مظاهرات جامعة الخرطوم أصابني رايش بتاعة طلقة، ورجلي أصيبت بطلقة مطاطية، في السجن في تم ضرب رأسي بحديدة. في معظم الأوقات بشتكي من صداع و تجيني كوابيس أثناء النوم وأثناء الاعتقال ما بقدر انوم.
الإساءة اللفظية الجنسية:
نحن ح نمارس معاك جنس، ح نبقيك زي أخواتك، وح نمارس مع أمك، سألوني عن ممارستي للجنس وقالوا لي أنت لقيت البنات كيف (صور البنات الفي صفحتي).
•ما اتعرضت لأي تحرش مادي او اغتصاب .
أسباب الإعتقال ؟ قالوا لي ما تمشي مع زول سياسي ، ولا اتصور معاهم .
أدوات التعذيب:
• البولسيين
• عصاة الكهرباء
• سلاح ناري (كلاش-طبنجات)
• الشلوت
غرفة الاعتقال :
تكييف عالي ، لمبة واحدة، شفت عدد من الشباب كانوا بيضربوهم كفوف وبالشلاليت في كل أعضاء الجسم كانوا بيقولوا عليهم اعترفوا والمساجين كانوا بيقولوا هم ما بعرفوا حاجة!
التحقيق يكون مع شخص مختلف
في الاعتقال الأول اتعرضت للضرب من 15 فرد ، في اعتقال جامعة النيلين في 5 أفراد يضربوا فينا بالكهرباء يجبرونا نقعد فى حته ساخنة في العربية، ما كان في دكتور اثناء التحقيق.
المعاملة في البداية قاسية وتحولت كويسة ، كانوا بيسألوني من الناس المتضامنة معاي ، وأول ما بقت في حملات تضامنية كانوا بيخفضوا سوء المعاملة وكانوا يوقفوني من الساعة12-3 الظهر بقيف في الشمس بالاضافة لزيت عربات ساخن بيكون مرشوش في الأرض يجبروني أقعد فيه.
أنا قعدت 6 ايّام اخر يوم كان الجمعة تم تهديدي إنو ما أتكلم عن التعذيب وسألوني انا كلمت منو عن اعتقالي.
أنا اعتقلت من الاثنين الساعة 10 صباحاً لحدي الأربعاء الساعة 11 م وقالوا لي أجي أتمم الصباح، في يوم الخميس انا تعبت جداً فهم خافوا وطلعوني من الزنزانة عشان أقعد في الشمس من الرطوبة وجابوا لي حبوب
التعذيب كان تخويف لي، وأثناء التعذيب كانوا يهددوني بأني ح أكون مسجون لسنتين وح يجددوهو لسنتين أضافية، ما جابوا لي زول من قبيلتي ، من التهديد انا بقيت ما بنشر في صفحتي في الفيسبوك وكانوا يهددوني بأسرتي (أبوي) تم اعتقاله لمدة 5 ساعات ومسكوه علشان أنا اظهر، الإعتقال ده بيحصل لأني انا بدافع عن حقوق الانسان وبعدها تتحول لأسباب عرقية، تم الأفراج عني يوم الخميس. كتبوني تعهد: انا ابراهيم أعلن عدم مشاركتي في أي احتجاجات أو مظاهرات في جامعة الخرطوم ولا حتى من مسافة 100 متر وهذا مني للاعتماد.