Description

مقابلة
اعتقال وتعذيب

الاسم : م.ع . م . ع اللقب . أ. ، مواليد 10/3/1993 بمدينة ك. ، طالب بجامعة كسلا كلية علوم الحاسوب وتقنية المعلومات قسم نظم المعلومات
في يوم 6/11/2018، كنت في تخريج لرابطة أبناء الشمال الأنا بنتمي ليها في قاعة الأمير عثمان دقنة وأنا ينتمي إلى تنظيم طلابي وعندنا عرف إنو نوشح الخريجين ونزفهم بهتافاتنا، وانتهينا عادي جدا ومرقت من القاعة، في بوكس مشي وراي نزلو منه شخصين قال لي معاك جهاز الأمن الوطني وعايزينك مشيت معاهم ولما وصلت البوكس كان في زول بنادوه بقولوا ليه تمام جنابو مصعب لفينا بالبوكس بعد ما شالوني وشالو معاي أربعة طلاب فيهم واحد منظم وثلاثة غير منظمين وصلنا مكاتب جهاز الأمن وهي بتقع جنب السوق الكبير، من نزلونا من البوكس ضربوا كل واحد فينا كف في رقبتو الكلام ده حوالي الساعة 5 مساء وقالو لينا أمشوا الحيطة، مشينا الحيطة جاب سوط وبدأ يضرب فينا وأثناء ما هو بيضرب في أفراد موزعين حوالينا بقولوا لينا إنتو بتعمل كده ليه ما تقرو قرايتكم. لمن أذن المغرب أفرج عن الطلاب غير المنظمين وفضلنا أنا ومعاي واحد واقفين على الحيطة ورافعين أيدينا لمن إيدي خدرت وجانا ضابط اسمه ميرغني أتكلم معاي قال لي اتلفت جاي يا مصطفى عليا، اتلفت عليه وقبل ما أركز كويس فيهم واحد بدأ يضربني في صدري وفي ظهري بي ايدو ضرب شديد والله الآثار للآن معاي مرات يجيني ضيق في التنفس، وبعدها ساقني جنب الحمامات عندهم مغسله رقدوني في الحوض جوه وكانت عفنه جدا وفتحوا علي المواسير وكانوا بقول حتتكلم وألا لا؟ مع إنو انا رديت على أسئلتهم كلها بعد التعذيب ده اضطريت أقول ليه حا أتكلم وبعدها وقفوا المواسير. وتاني بدأ الضرب بالبنية علي صدري وقضيت زي خمسه ساعة في الحال ده يقيفوا شوية وتاني يبدأ الضرب لمن جات الساعة 12 ليلا قالوا لي أمشي أهلك وتعال بكره الساعة 2 صباحا! يعني أمشي وأجي خلال ساعتين! قلت ليه البيت بعيد ومواصلات مافي الآن، قال لي الزمن ده بوديك ويجيبك امشي لي أمك عشان تبكي عليك. كل الكلام ده كان داخل حوش جهاز الأمن، المهم جاء جنابو ميرغني قال لي امشي لي أمك بي شكلك ده عشان تتخلع وتجي بكره الساعة 9 صباحا وطلعت وكنت مبلبل وريحتي عفنة. الأشخاص العذبوني واحد ضابط اسمه مصعب والأفراد ما بعرف أسمائهم، وكان معاي طالب تم تعذيبه معاي اسمه عمران بله وانا خليتو في المعتقل وما بعرف الحصل ليه شنو.
ما قابلت طبيب نسبة ظروفي المادية واستغلت المبلغ العندي للخروج من كسلا لأنهم كانوا بعذبوني شديد وكانوا قاصدني عديل وكانو بقولوا لي نحن حنكسر ليك راسك ده وممكن نقتلك ومافي زول يسالنا وبعدين جنابو مصعب كان يجبرني إني أقول الهتافات وأكتبها، وأنا اعتقلت من قبل ولكن لم يتم التعامل معي بهذه القسوة والألم في الصدر خصوصا ما فارقتني نهائي، ونفسيا تعبان جدا ومن يوم تعذيبي بقي عندي صداع شديد بس بطريقة ما منتظمة وعندي كوابيس في النوم، ولم أقم بأي إجراءات قانونية ضدهم لأني مالاقيت شخص قبلي اشتكي جهاز الأمن وكسب القضية.