Description

مقابلة
اعتقال وتعذيب
الاسم .أ. س. ب. أ. مواليد مدينة ك السواقي الجنوبية 8/7/1994، طالب بجامعة كسلا كلية الاقتصاد قسم المحاسبة المستوى الخامس.
تفاصيل ماحدث
في يوم 8 يناير 2018 الساعة 2 ونصف ظهراً خرجنا في مظاهرة سلمية بعد رفع الدعم عن الدقيق وبقت الرغيفة بجنيه، وبعد أن وصلنا المدرسة الثانوية كسلا كانت تطاردنا بكاسي جهاز الأمن والمخابرات الوطني، دخلنا في واحدة من بيوت المعلمين التابعة للمدرسة الثانوية، فجاء أفراد من الجهاز وكلهم كانوا لابسين لبس مدني، داهموا البيت وتم القبض علينا وتم نقلنا إلى مكاتب جهاز الأمن في كسلا على بوكس ودخلونا مكاتب الجهازوكان عددنا حوالي 20 طالب. أول ما نزلت من البوكس تم ضربي بالخرطوش على أي مكان في جسمي، وحوالي الساعة 11 مساء بدأوا في استجوابنا وأنا استجوبني زي ساعة تقريباً. انت عايز شنو من الحكومة تعملوا ليك وما عملتو وانت ولد صغير ولسه المستقبل قدامك وقال لي انت جنسك شنو لمن قلت ليه أنا شايقي، قال لي داير من البلد دى شنو و كسلا دي لحم رأس ما تضيع مستقبلك ساي.
وفي نفس اليوم فضلنا نحن سته شخص والبقية أطلق سراحهم، بقينا انا ومعي 5 أشخاص اتذكر منهم: أبو بكر الجيلي، عبدالرحمن عثمان، أبوبكر محمد. قضينا في هذا الموقع يومين دون أن يتم تقديم أي مذكرة إعتقال لي ولم أتمكن من طلب محامي، وطوال اليومين كان يتم ضربي في أوقات متقطعة وما بذكر الزمن يستمر كم لكن كان ضرب بطريقة متكررة وفي أي وقت. مساء اليوم الأول تناوب خمسة أشخاص في ضربي بخراطيش وكل مره واحد يريح ويتبادلو فيني. كانوا يسألوننا من الذي أمركم بالخروج للشارع ويقولون لي لو كلمتنا القاليك أمرقوا الشارع منو بنفكك وبعد ما انتهي الجلد ثم اجلاسنا على الارض بي صلبي وتربع يدينك وتعاين للأرض، ولو رفعت رأسك يتم ضربك على ظهرك بي خرطوش وكنا في حوش مكاتب الجهاز، وبعدها دخلوني الزنزانة وهي غرفة أربعة في أربعة تقريبا فيها شباك وبالليل كانت الإضاءة خافتة جدا جدا. ماعرفت اسماء الناس العذبوني لكن في واحد كانوا يقول ليهم أحمد وكلهم كانوا لابسين ملكي وما شفت زول مسلح إلا واحد وهو بضرب فيني وقعت منو طبنجة. بالنسبه للأكل أدوني سندويش فول والله فيه تقريبا 10 فولات لو ما أخاف الكذب، وبالنسبة للموية من الماسورة وتمشي على الماسورة وانت تزحف على الأرض وبي مزاجهم هم. أجبروني على التوقيع على تعهد بأن لا أمارس أي عمل سياسي وأن لا أشارك في مظاهرات مرة أخرى.
لم اتمكن من الحصول علي أي رعاية صحية مع إني كنت مضروب في ركبتي وكلمتهم قلت ليهم ركبتي فيها ألم شديد قالوا لي تجري بيها عشان تفك وكانوا يسخروا مني وقالوا لي تقيف علي ركبتك الواجعاك دي لكن بعد التعذيب، مشيت لي طبيب صحبي أدانى مرهم مسكن كده ركبتي تعرضت لاذى شديد نتيجة التعذيب. للأسف ما مسموح إنك تفتح بلاغ في جهاز الأمن عشان كدا ما بديت الإجراء أصلا.